Sgéal eile

Tadhg Ó hUrdail - Tulacha, an Bunán d'innis dom é seo:-Aon lá amháin chuaidh a athair ar aonach go Beanntraighe agus ba leasc leis an baile d'fhágaint in am tráth[a]. Sa Samhradh do thuit an rud seo amach. Bhí an oidhche ann agus athair Thaidhg ag déanamh ar a thigh féin agus díreach agus é ag dul thar an dtuar thug sé fé ndeara go raibh na ba bainne go léir ina luighe ann.Tháinig sé isteach, chuir sé an capall sa stábla agus bhuail sé féin isteach sa tigh cómhnuidhthe. Bhí muinntear an tighe ina gcodladh acht bhí a bhean ina dúiseacht. Bhí rud éigin le n-ithe do cois na teine agus nuair do shuidh an fear in aice na teineadh d'airigh sé na ba go léir ag rith agus ag géimnigh sa chlós. D'éirigh an fear chun dul amach acht d'fhógair a bhean a bhí sa lochta gan a chos do chuir (=chur: ainm briathartha) thar táirsigh an dorais.Dhein sé amhlaidh agus maidean i mbáireach bhí na ba go léir sa tuar acht tamall ina dhiaidh fuair na ba go léir bás ceann ar cheann.