Tá áit i gcomharsanacht Bhéal Átha an Ghaorthaidh agus ’sé an t-ainm atá air ná Doire na Buairce. ’Sé an chúis gur tugadh an t-ainm sin air ná seo:- Bhí bean ag crú bó in aice coille ansan fadó agus bhí buaircín ar an mboin. D’airigh sí duine taobh thiar di; d’fhéach sí agus chonaic sí firín anabheag ’na shuí fé chrann agus duairt sé léi go raibh sé ag tabhairt aire do phróca óir a bhí fén gcrann, agus annsan sceinn sé as a radharc. Do bhain sí an buaircín don bhoin agus do chuir sí ar an gcrann é chun go n-aithneodh sí an crann arís. Nuair a tháinig sí thar n-ais, i gcionn tamaillín, bhí buaircín ar gach crann roimpi agus níor fhéad sí an t-ór d’fháil. Sin fáth gur tugadh “Doire na Buairce” ar an áit.